A Glimpse of Internal Politics of the Sikhs of New Zealand

ਮਿਤੀ: 6 ਸਿਤੰਬਰ 2008

ਵਾਹਿਗੁਰੂ ਜੀ ਕਾ ਖਾਲਸਾ ॥

ਵਾਹਿਗੁਰੂ ਜੀ ਕੀ ਫਤਿਹ ॥

ਸਿਖ ਕਾਊਂਸਲ ਆਫ ਨਿਊਜ਼ੀਲੈਂਡ ਦੇ ਕਈ ਮੈਂਬਰਾਂ ਨੂੰ ਸ. ਮਨਪ੍ਰੀਤ ਸਿੰਘ ਦੇ ਦਸਤਖਤਾਂ ਵਾਲੀ ਚਿੱਠੀ ਪਿਛਲੇ ਦਿਨੀਂ ਡਾਕ ਰਾਹੀਂ ਪ੍ਰਾਪਤ ਹੋਈ। ਇਸ ਚਿੱਠੀ ਵਿਚ ਕਈ ਅਜਿਹੀਆਂ ਗੱਲਾਂ ਕਹੀਆਂ ਗਈਆਂ ਹਨ ਜੋ ਅਸਲੀਅਤ ਤੋਂ ਭਿੰਨ ਹਨ। ਅਸੀਂ ਕ੍ਰਮਵਾਰ ਇਨ੍ਹਾਂ ਦਾ ਖੁਲਾਸਾ ਆਮ ਸੰਗਤ ਦੀ ਜਾਣਕਾਰੀ ਲਈ ਹੇਠ ਕਰ ਰਹੇ ਹਾਂ:

1. ਸਿਖ ਕਾਊਂਸਲ ਆਫ ਨਿਊਜ਼ੀਲੈਂਡ 26 ਸਿਤੰਬਰ 2007 ਨੂੰ ਰਜਿਸਟਰ ਕੀਤੀ ਗਈ ਅਤੇ ਨਿਊਜ਼ੀਲੈਂਡ ਦੀ ਸਾਰੀ ਸੰਗਤ ਨੂੰ ਇਹ ਖੁੱਲ੍ਹਾ ਸੱਦਾ ਦਿੱਤਾ ਗਿਆ ਕਿ ਇਸ ਦੇ ਮੈਂਬਰ ਬਣ ਕੇ ਕੌਮ ਦੇ ਭਵਿੱਖ ਲਈ ਰੱਲ ਕੇ ਕੰਮ ਕਰੀਏ। ਪਹਿਲੇ ਦਿਨ ਤੋਂ ਹੀ ਅਜੀਤ ਸਿੰਘ ਰੰਧਾਵਾ, ਦਲਜੀਤ ਸਿੰਘ ਅਤੇ ਮਨਪ੍ਰੀਤ ਸਿੰਘ ਨੇ ਸਿੱਖ ਕਾਊਂਸਲ ਦੀ ਮੁਖਾਲਫ਼ਤ ਸ਼ੁਰੂ ਕਰ ਦਿੱਤੀ। ਇਹ ਮੁਖਾਲਫ਼ਤ ਕਿਸ ਤਰੀਕੇ ਨਾਲ ਕੀਤੀ ਗਈ ਇਸ ਦਾ ਅੰਦਾਜਾ ਆਪ ਕੁੱਝ ਉਦਾਹਰਣਾਂ ਤੋਂ ਲਾ ਸਕਦੇ ਹੋ – ਅਜੀਤ ਸਿੰਘ ਰੰਧਾਵਾ ਦਾ ਪੰਜ ਸਿੰਘਾਂ ਦੀ ਕਾਊਂਸਲ ਬਾਰੇ ਆਮ ਨੂੰ ਕਥਨ ਸੀ, “ਸਾਡੇ ਉੱਤੇ ਪੰਜ ਛੱਪਰ ਜਿਹੇ ਲਿਆ ਕੇ ਬਿਠਾ ਦੇਣੇ ਆ।” ਦਲਜੀਤ ਸਿੰਘ ਨੇ ਅਖਬਾਰ ਵਿਚ ਬਿਆਨ ਦਿੱਤਾ, “ਸਿੱਖ ਕਾਊਂਸਲ ਤਾਂ ਪਾਣੀ ਵਿਚ ਮਧਾਣੀ ਹੈ।” ਮਨਪ੍ਰੀਤ ਸਿੰਘ ਨੇ ਨਿਊਜ਼ੀਲੈਂਡ ਸਿੱਖ ਸੁਸਾਇਟੀ ਦੀ ਆਪਣੀ ਪ੍ਰਧਾਨਗੀ ਦੀ ਦੁਰਵਰਤੋਂ ਕਰਦਿਆਂ ਆਪਣੀ ਨਵੰਬਰ 2007 ਦੀ ਮੀਟਿੰਗ ਵਿਚ ਸਿੱਖ ਕਾਊਂਸਲ ਦੇ ਪ੍ਰਧਾਨ ਅਤੇ ਸਕੱਤਰ ’ਤੇ ਝੂਠੇ ਦੂਸ਼ਣ ਲਾਏ ਕਿ ਸਿੱਖ ਕਾਊਂਸਲ ਗੁਰਦੁਆਰਿਆਂ ਦੇ ਖਿਲਾਫ਼ ਬੋਲਦੀ ਹੈ। ਇਹ ਕੇਵਲ ਕੁੱਝ ਕੁ ਉਦਾਹਰਣਾਂ ਹੀ ਹਨ ਜੋ ਦਰਸਾਉਂਦੀਆਂ ਹਨ ਕਿ ਇਹ ਤਿਕੜੀ ਮੁੱਢ ਤੋਂ ਹੀ ਸਿੱਖ ਕਾਊਂਸਲ ਨੂੰ ਢਾਹ ਲਾਉਣ ਦੀ ਚਾਹਵਾਨ ਰਹੀ ਹੈ।

2. ਇਸ ਵਿਚ ਜੋ ਸੱਭ ਤੋਂ ਅਸਚਰਜ ਵਾਲੀ ਗੱਲ ਹੈ ਉਹ ਇਹ ਹੈ ਕਿ ਆਮ ਸੰਗਤ ਵਿਚ ਇਹ ਗੱਲ ਮਸ਼ਹੂਰ ਹੈ ਕਿ ਅਜੀਤ ਸਿੰਘ ਰੰਧਾਵਾ ਪੰਜਾਬ ਵਿਚਲੀ ਖਾੜਕੂ ਲਹਿਰ ਦਾ ਸ਼ੁਰੂ ਤੋਂ ਹੀ ਵਿਰੋਧੀ ਰਿਹਾ ਹੈ ਅਤੇ ਕਾਂਗਰਸ ਪਾਰਟੀ ਵਲੋਂ (ਜਾਂ ਉਸ ਦੀ ਹਮਾਇਤ ਨਾਲ) ਆਪਣੇ ਪਿੰਡ ਰੰਧਾਵਾ ਮਸੰਦਾਂ ਦਾ ਸਰਪੰਚ ਵੀ ਰਿਹਾ ਹੈ। ਇਸ ਦੇ ਉਲਟ ਮਨਪ੍ਰੀਤ ਸਿੰਘ ਤੇ ਦਲਜੀਤ ਸਿੰਘ ਆਪਣੇ ਆਪ ਨੂੰ ਖਾੜਕੂ ਅਖਵਾਉਂਦੇ ਹਨ ਤੇ ਸ਼ਹੀਦਾਂ ਦੇ ਪਰਿਵਾਰਾਂ ਦੇ ਹਮਾਇਤੀ ਦਸਦੇ ਹਨ। ਅਸਲੀਅਤ ਵਿਚ ਇਸ ਤਿਕੜੀ ਵਿਚ ਕੋਈ ਮੱਤ-ਭੇਦ ਕਦੇ ਵੀ ਨਹੀਂ ਰਿਹਾ। ਸਗੋਂ ਅਜੀਤ ਸਿੰਘ ਰੰਧਾਵਾ ਦਾ ਇਕ ਵੱਡਾ ਰੋਲ ਰਿਹਾ ਹੈ ਦਲਜੀਤ ਸਿੰਘ/ਮਨਪ੍ਰੀਤ ਸਿੰਘ ਨੂੰ ਪਹਿਲਾਂ ਉਟਾਹੁਹੂ ਗੁਰਦੁਆਰਾ ਸਾਹਿਬ ਤੇ ਅਤੇ ਫਿਰ ਟਾਕਾਨੀਨੀ ਗੁਰਦੁਆਰਾ ਸਾਹਿਬ ਤੇ ਕਾਬਜ ਕਰਣ ਦਾ। ਹੁਣ ਸਵਾਲ ਇਹ ਉੱਠਦਾ ਹੈ ਕਿ ਰੰਧਾਵਾ ਸਾਹਿਬ ਨੇ ਆਪਣੀ ਕਾਂਗਰਸੀ ਸੋਚ ਅਤੇ ਭਾਰਤ ਸਰਕਾਰ ਨਾਲ ਨੇੜਤਾ ਦਾ ਕਦੇ ਲਕੋਅ ਨਹੀਂ ਕੀਤਾ। ਤੇ ਦਲਜੀਤ ਸਿੰਘ/ਮਨਪ੍ਰੀਤ ਸਿੰਘ ਨੇ ਹਰੇਕ ਮੌਕੇ ਇਹ ਜਤਾਇਆ ਹੈ ਕਿ ਉਹ ਭਾਰਤ ਸਰਕਾਰ ਦੇ ਬਿਲਕੁਲ ਵਿਰੁੱਧ ਹਨ ਤੇ ਉਨ੍ਹਾਂ ਦੇ ਹਮਾਇਤੀ ਹਨ ਜਿਨ੍ਹਾਂ ਦਾ ਟੀਚਾ ਭਾਰਤ ਸਰਕਾਰ ਦਾ ਤਖਤਾ ਪਲਟਣ ਦਾ ਹੈ। ਹੁਣ ਸੰਗਤ ਅੱਗੇ ਸਵਾਲ ਇਹ ਹੈ ਕਿ ਇਸ ਤਿਕੜੀ ਵਿਚ ਕਿਹੜੀ ਅਜਿਹੀ ਸਾਂਝ ਹੈ ਜਿਸ ਕਰਕੇ ਇਹ ਇਕੱਠੇ ਹੋ ਕੇ ਨਿਊਜ਼ੀਲੈਂਡ ਦੀ ਸਾਰੀ ਸਿੱਖ ਕੌਮ ਨੂੰ ਪਿਛਲੇ ਤਕਰੀਬਨ ਇਕ ਦਹਾਕੇ ਤੋਂ ਅੱਗੇ ਲਾਈ ਬੈਠੇ ਹਨ ਅਤੇ ਕੌਮ ਦੇ ਭਵਿੱਖ ਨੂੰ ਪੱਕਿਆਂ ਕਰਣ ਵਾਲੇ ਹਰੇਕ ਪ੍ਰਾਜੈਕਟ ਨੂੰ ਦੁਰਕਾਰਦੇ ਫਿਰਦੇ ਹਨ?

3. ਸੰਗਤ ਦੀ ਜਾਣਕਾਰੀ ਹੇਤ ਅਸੀਂ ਇਹ ਵੀ ਦੱਸ ਦਈਏ ਕਿ ਅਜੀਤ ਸਿੰਘ ਰੰਧਾਵਾ ਨੇ ਆਪਣੀ ਇਕ ਈ-ਮੇਲ ਵਿਚ ਇਹ ਵੀ ਲਿਖਿਆ ਹੈ ਕਿ ਸਿਖ ਕਾਊਂਸਲ ਆਫ ਨਿਊਜ਼ੀਲੈਂਡ ਤੋਂ ਉਸ ਨੂੰ ਇਹ ਡਰ ਹੈ ਕਿ ਜਿਹੜੇ “ਖਾੜਕੂਵਾਦ ਦੇ ਹਨੇਰੇ” ਨੂੰ ਉਸਨੇ ਬੜੇ ਜਤਨਾਂ ਨਾਲ ਨਿਊਜ਼ੀਲੈਂਡ ਵਿਚੋਂ ਦੂਰ ਕੀਤਾ ਸੀ ਸਿੱਖ ਕਾਊਂਸਲ ਉਹ ਹਨੇਰਾ ਵਾਪਸ ਲਿਆ ਰਹੀ ਹੈ। ਇਸ ਤੋਂ ਇਕ ਨਵਾਂ ਸਵਾਲ ਪੈਦਾ ਹੁੰਦਾ ਹੈ – ਸਿੱਖ ਕਾਊਂਸਲ ਨੇ ਕਦੀ ਵੀ ਖਾੜਕੂਵਾਦ ਦੀ ਹਮਾਇਤ ਵਿਚ ਜਾਂ ਖਿਲਾਫਤ ਵਿਚ ਕਦੇ ਕੋਈ ਬਿਆਨ ਨਹੀਂ ਦਿੱਤਾ, ਪਰ ਅਸੀਂ ਦੋ ਗੱਲਾਂ ਤੇ ਸਦਾ ਜੋਰ ਦਿੱਤਾ ਹੈ ਕਿ ਪੰਜਾਬ ਵਿਚ ਆਮ ਸਿੱਖਾਂ ਤੇ ਸਰਕਾਰੀ ਏਜੰਸੀਆਂ ਵਲੋਂ (ਕੇ ਪੀ ਐੱਸ ਗਿੱਲ, ਸੁਮੇਧ ਸੈਣੀ, ਪੂਹਲਾ ਨਿਹੰਗ, ਗੁਰਪ੍ਰੀਤ ਕੈਟ, ਜਗਦੀਸ਼ ਟਾਈਟਲਰ, ਸੱਜਣ ਕੁਮਾਰ, ਆਦਿ ਵਰਗਿਆਂ ਰਾਹੀਂ) ਜੋ ਜਬਰ ਕੀਤਾ ਗਿਆ ਉਸਦਾ ਇੰਨਸਾਫ ਕਚਿਹਰੀਆਂ ਰਾਹੀਂ ਹੋਣਾਂ ਚਾਹੀਦਾ ਹੈ ਅਤੇ ਦੂਜੀ ਗੱਲ ਕਿ ਹਰੇਕ ਸਿੱਖ ਨੂੰ ਮੁੜ ਗੁਰਮਤਿ ਨਾਲ ਆਪਣੇ ਆਪ ਨੂੰ ਜੋੜ ਕੇ ਸਾਡੀ ਕੌਮੀ ਅਣਖ ਨੂੰ ਮੁੜ ਅਸਮਾਨਾਂ ਦੀਆਂ ਉਚਾਈਆਂ ਤੱਕ ਲੈਕੇ ਜਾਣ ਵੱਲ ਤੁਰਨਾ ਚਾਹੀਦਾ ਹੈ। ਜੇ ਅਜੀਤ ਸਿੰਘ ਰੰਧਾਵਾ/ਦਲਜੀਤ ਸਿੰਘ/ਮਨਪ੍ਰੀਤ ਸਿੰਘ ਨੂੰ ਸਾਡਾ ਇਹ ਟੀਚਾ “ਖਾੜਕੂਵਾਦ ਦਾ ਹਨੇਰਾ” ਜਾਪਦਾ ਹੈ ਤਾਂ ਸੰਗਤ ਆਪ ਸਮਝ ਲਵੇ ਕਿ ਇਸ ਤਿਕੜੀ ਦੀ ਅਸਲੀਅਤ ਕੀ ਹੈ।

4. ਜੇ ਹੁਣ ਅਸੀਂ ਕੌਮੀ ਏਕਤਾ ਦੀ ਗੱਲ ਕਰੀਏ, ਜਿਸ ਦੀ ਦੁਹਾਈ ਇਹ ਤਿਕੜੀ ਅੱਜ ਦੇ ਰਹੀ ਹੈ ਤਾਂ ਪਹਿਲਾ ਸਵਾਲ ਤਾਂ ਇਹ ਉੱਠਦਾ ਹੈ ਕਿ ਅਜੇ ਤੱਕ ਤਾਂ ਇਸ ਤਿਕੜੀ ਦਾ ਕੰਮ ਕੌਮ ਨੂੰ ਪਾੜਣ ਦਾ ਹੀ ਰਿਹਾ ਹੈ – ਉਟਾਹੁਹੂ ਤੋਂ ਅਲੱਗ ਹੋ ਕੇ ਜਿੰਨੇ ਗੁਰਦੁਆਰੇ ਨਵੇਂ ਬਣੇ ਉਸ ਵਿਚ ਇਸ ਤਿਕੜੀ ਦਾ ਵੱਡਾ ਰੋਲ ਰਿਹਾ ਹੈ। ਜਦੋਂ ਸਿਖ ਕਾਊਂਸਲ ਆਫ ਨਿਊਜ਼ੀਲੈਂਡ ਦੇ ਝੰਡੇ ਹੇਠ ਇਹ ਆਪਸੀ ਵੈਰ ਰੱਖਣ ਵਾਲੀਆਂ ਜਥੇਬੰਦੀਆਂ ਇਕੱਠੀਆਂ ਹੋਣ ਲੱਗੀਆਂ ਤਾਂ ਇਸ ਤਿਕੜੀ ਨੇ ਫਿਰ ਪਾੜ ਪਾਉਣ ਲਈ ਅਖੌਤੀ “ਸੁਪਰੀਮ ਸਿੱਖ ਕਾਊਂਸਲ” ਨਾਂ ਦਾ ਸੱਪ ਨਿਊਜ਼ੀਲੈਂਡ ਦੀ ਸਿੱਖ ਕੌਮ ਦੇ ਗੱਲ ਪਾ ਕੇ ਸਵੱਛ ਹੁੰਦੇ ਕੌਮੀਅਤ ਦੇ ਪਾਣੀ ਨੂੰ ਮੁੜ ਗੰਧਲਾ ਕਰ ਦਿੱਤਾ ਹੈ – ਪਰ ਗੱਲਾਂ ਏਕਤਾ ਦੀਆਂ ਹੋ ਰਹੀਆਂ ਹਨ। ਅਸਾਂ ਇਕ ਚਿੱਠੀ ਰਾਹੀਂ ਇਸ ਤਿਕੜੀ ਨੂੰ ਇਹ ਕਿਹਾ ਸੀ ਕਿ ਤੁਹਾਡੀਆਂ ਗੱਲਾਂ ਤੁਹਾਡੇ ਕੰਮਾਂ ਨਾਲ ਮੇਲ ਨਹੀਂ ਖਾਂਦੀਆਂ, ਸੋ ਤੁਸੀਂ ਕੁੱਝ ਸੁਝਾਏ ਕਦਮ ਪੁੱਟੋ ਤਾਂ ਕਿ ਸਾਨੂੰ ਯਕੀਨ ਹੋਵੇ ਕਿ ਤੁਸੀਂ ਕੌਮ ਦੀ ਏਕਤਾ ਲਈ ਸਾਫ਼ ਦਿਲ ਨਾਲ ਚਾਹਵਾਨ ਹੋ। ਉਸ ਚਿੱਠੀ ਦਾ ਜਵਾਬ ਸਾਨੂੰ ਅਜੇ ਤੱਕ ਨਹੀਂ ਮਿਲਿਆ। ਇਸਦੇ ਉਲਟ ਉਸ ਚਿੱਠੀ ਤੋਂ ਬਾਦ ਵਿਚ ਇਸ ਤਿਕੜੀ ਨੇ ਕਈ ਹੋਰ ਕੰਮ ਅਜਿਹੇ ਕੀਤੇ ਜੋ ਇਨ੍ਹਾਂ ਦੇ ਦਿਲਾਂ ਦੀ ਕਾਲਖ ਨੂੰ ਉਜਾਗਰ ਕਰ ਗਏ। ਮਿਸਾਲ ਵਜੋਂ ਜਦੋਂ ਭਾਈ ਸਾਹਿਬ ਭਾਈ ਅਨੂਪ ਸਿੰਘ ਦਾ ਜਥਾ ਟਾਕਾਨੀਨੀ ਪਹੁੰਚਿਆ ਤਾਂ ਇਸ ਤਿਕੜੀ ਨੇ ਗਿਣੀ-ਮਿੱਥੀ ਚਾਲ ਨਾਲ ਉਨ੍ਹਾਂ ਨੂੰ ਗੁਰੂ ਸਾਹਿਬ ਦੀ ਹਜੂਰੀ ਵਿਚ ਕੀਰਤਨ ਕਰਣ ਤੋਂ ਰੋਕ ਦਿੱਤਾ। ਕਾਰਣ ਇਹ ਦਿੱਤਾ ਗਿਆ ਕਿ ਅਖਬਾਰ ਵਿਚ ਜੋ ਇਸ਼ਤਿਹਾਰ ਜੱਥੇ ਦੇ ਪਰੋਗਰਾਮ ਦਾ ਛਪਿਆ ਸੀ ਉਸ ਵਿਚ ਸਿੱਖ ਕਾਊਂਸਲ ਦੇ ਪ੍ਰਧਾਨ ਦਾ ਨਾਮ “ਜਾਣਕਾਰੀ ਲਈ ਸਪੰਰਕ ਕਰੋ” ਹੇਤ ਦਿੱਤਾ ਸੀ (ਸਿਖ ਕਾਊਂਸਲ ਦਾ ਨਾਮ ਭਾਵੇਂ ਕਿਤੇ ਵੀ ਨਹੀ ਸੀ)। ਇਸ ਲਈ, ਇਸ ਤਿਕੜੀ ਦਾ ਕਹਿਣਾ ਸੀ, ਜੱਥੇ ਨੂੰ ਗੁਰੂ ਸਾਹਿਬ ਦੀ ਹਜੂਰੀ ਵਿਚ ਕੀਰਤਨ ਨਹੀਂ ਕਰਣ ਦਿੱਤਾ ਜਾ ਸਕਦਾ। ਇਕ ਪਾਸੇ ਇਹ ਹਰਕਤਾਂ ਹੋ ਰਹੀਆਂ ਹਨ ਤੇ ਦੂਜੇ ਪਾਸੇ ਏਕੇ ਦੀ ਗੱਲ ਹੁੰਦੀ ਹੈ। ਹੁਣ ਇਹ ਸੱਜਣ ਇਹ ਹੱਕ ਵੀ ਜਤਾਉਂਦੇ ਹਨ ਕਿ ਕੌਣ ਗੁਰੂ ਸਾਹਿਬ ਦੀ ਹਜੂਰੀ ਵਿਚ ਗੁਰ-ਸ਼ਬਦ ਦਾ ਕੀਰਤਨ ਕਰ ਸਕਦਾ ਹੈ ਤੇ ਕੌਣ ਨਹੀਂ ਇਸਦਾ ਫੈਸਲਾ ਇਹ ਤਿਕੜੀ ਕਰੇਗੀ। ਪਰ ਸਾਡੇ ਪ੍ਰਧਾਨ ਸਾਹਿਬ ਨੇ ਪੁੱਛਿਆ ਕਿ ਹੁਣ ਕੀ ਚਾਹੁੰਦੇ ਹੋ ਕਿ ਕੀ ਹੋਵੇ? ਇਨ੍ਹਾਂ ਦੀਆਂ ਹੋਛੀਆਂ ਸ਼ਰਤਾਂ ਮੰਨ ਕੇ ਉਸ ਦਿਨ ਪ੍ਰੋਗਰਾਮ ਸਿਰੇ ਚੜਿਆ। ਸੰਗਤ ਆਪ ਇਸਦਾ ਅੰਦਾਜਾ ਲਾ ਲਵੇ ਕਿ ਜੇ ਸਾਡਾ ਟੀਚਾ ਕਿਸੇ ਨੂੰ ਨੀਵਾਂ ਵਖਾਉਣ ਦਾ ਹੁੰਦਾ ਤਾਂ ਅਸੀਂ ਭਾਈ ਅਨੂਪ ਸਿੰਘ ਦੇ ਜੱਥੇ ਨੂੰ ਵਾਪਿਸ ਲੈ ਜਾਂਦੇ ਤੇ ਸੰਗਤ ਨੂੰ ਦੱਸਦੇ ਕਿ ਇਹ ਤਿਕੜੀ ਕਿੰਨੀ ਕੁ ਕੌਮ ਦੀ ਸੇਵਾ ਕਰ ਰਿਹੀ ਹੈ।

5. ਇਹੀ ਨਹੀਂ ਸਗੋਂ ਆਫਿਸ ਆਫ ਐਥਨਿਕ ਅਫੇਅਰਜ਼ ਨੇ ਇਕ ਮੀਟਿੰਗ ਕੌਮਾਂ ਦੇ ਆਗੂਆਂ ਦੀ 28 ਅਗਸਤ ਨੂੰ ਬੁਲਾਈ। ਇਸ ਤਿਕੜੀ ਨੇ ਇਸ ਕਰਕੇ ਉਸ ਮੀਟਿੰਗ ਵਿਚ ਆਉਣ ਤੋਂ ਨਾਂਹ ਕਰ ਦਿੱਤੀ ਕਿ ਇਹ ਮੀਟਿੰਗ ਸਿੱਖ ਕਾਊਂਸਲ ਆਫ ਨਿਊਜ਼ੀਲੈਂਡ ਦੇ ਇਕ ਮੈਂਬਰ ਦੇ ਰੈਸਟੌਰੈਂਟ ਵਿਚ ਕੀਤੀ ਜਾ ਰਹੀ ਹੈ। ਇਹੀ ਨਹੀਂ ਸਗੋਂ ਇਸ ਤਿਕੜੀ ਨੇ ਉਸੇ ਸ਼ਾਮ ਆਪਣੇ ਢਾਈ ਟੋਟਰੂਆਂ ਨਾਲ ਅਲੱਗ ਮੀਟਿੰਗ ਕਰਵਾਈ। ਇਹ ਚਾਲੇ ਏਕੇ ਵਾਲੇ ਤਾਂ ਕਿਸੇ ਪੱਖੋਂ ਵੀ ਨਹੀਂ ਜਾਪਦੇ।

ਹੁਣ ਅਸੀਂ ਗੱਲ ਕਰੀਏ ਸਿੱਖ ਕਾਊਂਸਲ ਆਫ ਨਿਊਜ਼ੀਲੈਂਡ ਦੇ ਕੰਮਾਂ ਦੀ ਜਿਸ ਨੇ ਇਸ ਤਿਕੜੀ ਨੂੰ ਇੰਨਾਂ ਬੌਖਲਾ ਦਿੱਤਾ ਹੈ।

1. ਅਸੀਂ ਨਿਊਜ਼ੀਲੈਂਡ ਪੁਲਿਸ ਨਾਲ ਗੱਲ-ਬਾਤ ਕਰਕੇ ਪੱਗ ਅਤੇ ਪੰਜ ਕਕਾਰਾਂ ਨੂੰ ਸਿੱਖ ਸਿਪਾਹੀਆਂ ਦੀ ਪੁਲਿਸ ਯੁਨੀਫਾਰਮ ਦੇ ਹਿੱਸੇ ਵਜੋਂ ਮੰਜੂਰੀ ਦਿਵਾਈ।

2. ਅਸੀਂ ਇਮੀਗ੍ਰੇਸ਼ਨ ਬਿੱਲ ਤੇ ਪਾਰਲੀਮੈਂਟ ਦੀ ਸਿਲੈਕਟ ਕਮੇਟੀ ਤੱਕ ਕੌਮ ਦੇ ਸ਼ੰਕਿਆਂ ਨੂੰ ਪਹੁੰਚਾਇਆ।

3. ਵਾਇਟਾਂਗੀ ਡੇਅ ਤੇ ਨਾਟੀ ਫਾਤੂਆ ਓ ਔਰੋਕਾਈ ਦੇ ਸੱਦੇ ਤੇ ਛੇਅ ਮੈਂਬਰੀ ਵਫਦ ਨੇ ਕੌਮ ਦੀ ਨੁਮਾਇੰਦਗੀ ਕੀਤੀ।

4. ਫਰਵਰੀ ਵਿਚ ਆਕਲੈਂਡ ਇੰਟਰਨੈਸ਼ਨਲ ਕਲਚਰਲ ਫੈਸਟੀਵਲ ਵਿਚ ਪੰਜਾਬੀ ਯੂਥ ਗਰੁੱਪ ਨਾਲ ਰੱਲ ਕੇ ਕੌਮ ਬਾਰੇ ਲਿਟਰੇਚਰ ਵੰਡਿਆ ਤੇ ਪਾਣੀ ਦੀ ਛਬੀਲ ਲਾਈ।

5. ਟੌਰੰਗੇ ਲਾਗੇ ਕੈਟੀ ਕੈਟੀ ਨਾਮ ਦੀ ਜਗ੍ਹਾ ਤੇ 1979 ਤੋਂ ਲੱਗਦੇ ਆ ਰਹੇ ਅਪ੍ਰੈਲ ਦੇ ਬਸੰਤ ਦੇ ਮੇਲੇ ਵਿਚ ਭੰਗੜੇ ਦੀ ਆਈਟਮ ਕਰਵਾ ਕੇ ਗੋਰਿਆਂ ਨੂੰ ਵੀ ਕਾਇਲ ਕੀਤਾ।

6. ਮਨੂਰੀਵੇ ਵਿਚ ਨਵਤੇਜ ਸਿੰਘ ਦੀ ਦੁਖਦਾਈ ਮੌਤ ਤੋਂ ਬਾਦ ਪੁਲਿਸ ਨਾਲ ਗੱਲ-ਬਾਤ ਕਰਕੇ ਇਕ “ਸਾਊਥ ਏਸ਼ੀਅਨ ਲੀਏਜ਼ਨ ਅਫਸਰ” ਦੀ ਪੋਸਟ ਕਾਇਮ ਕਰਵਾਈ ਜਿਸ ਲਈ ਗੁਰਪ੍ਰੀਤ ਸਿੰਘ ਨਾਂ ਦੇ ਪੁਲਿਸ ਅਫਸਰ ਦੀ ਨਿਯੁਕਤੀ ਹੋਈ। ਇਹ ਅਫਸਰ ਕੌਮ ਦੇ ਸ਼ੰਕਿਆਂ ਦੇ ਨਿਵਾਰਣ ਲਈ ਕੰਮ ਕਰੇਗਾ।

7. ਇਕ ਬੰਬਈ ਤੋਂ ਆਏ ਸਿੱਖ ਵਿਦਿਆਰਥੀ ਤੇ “ਹਥਿਆਰ ਰੱਖਣ” ਦਾ ਦੋਸ਼ ਪੁਲਿਸ ਵਲੋਂ ਲਾਇਆ ਗਿਆ ਜਿਸ ਦੇ ਨਿਵਾਰਣ ਲਈ ਸਿੱਖ ਕਾਊਂਸਲ ਆਫ ਨਿਊਜ਼ੀਲੈਂਡ ਨੇ ਪੁਲਿਸ, ਕਚਿਹਰੀਆਂ ਤੇ ਸਿਆਸਤਦਾਨਾਂ ਤੱਕ ਪਹੁੰਚ ਕੀਤੀ ਤੇ ਅਗਾਂਹ ਤੋਂ ਅਜਿਹਾ ਕੋਈ ਕਾਰਾ ਨਾਂ ਵਰਤੇ ਉਸ ਲਈ ਗੱਲ-ਬਾਤ ਦੀ ਸ਼ੁਰੂਆਤ ਕੀਤੀ।

8. ਮੈਸੀ ਯੁਨੀਵਰਸਿਟੀ ਵਿਚ “Spirituality Week” ਦੌਰਾਨ ਸਿੱਖੀ ਅਤੇ ਸਿੱਖਾਂ ਬਾਰੇ ਜਾਣਕਾਰੀ ਦੇਣ ਲਈ ਸੱਤ ਦਿਨ ਸਟਾਲ ਲਾਇਆ।

9. ਮਾਰਚ ਦੇ ਮਹੀਨੇ ਵੈਲਿੰਗਟਨ ਵਿਚ ਪਹਿਲਾ ਯੂਥ ਇੰਟਰਫੇਥ ਫੋਰਮ ਹੋਇਆ ਜਿਸ ਵਿਚ ਸਿੱਖ ਕਾਊਂਸਲ ਆਫ ਨਿਊਜ਼ੀਲੈਂਡ ਨੇ ਸਿੱਖਾਂ ਦੀ ਨੁਮਾਇੰਦਗੀ ਕੀਤੀ। ਅਗਲੇ ਸਾਲ ਦਾ ਪ੍ਰੋਗਰਾਮ ਸਿੱਖ ਕਾਊਂਸਲ ਆਫ ਨਿਊਜ਼ੀਲੈਂਡ ਹੀ ਹੋਰਨਾਂ ਧਰਮਾਂ ਨਾਲ ਰੱਲ ਕੇ ਅਰਗੇਨਾਈਜ਼ ਕਰ ਰਹੀ ਹੈ।

10. ਸਿੱਖ ਕੌਮ ਦੇ ਭਵਿੱਖ ਨੂੰ ਧਿਆਨ ਵਿਚ ਰੱਖਦਿਆਂ ਸਿੱਖ ਕਾਊਂਸਲ ਆਫ ਨਿਊਜ਼ੀਲੈਂਡ ਹਰ ਸਾਲ ਘੱਟ ਤੋਂ ਘੱਟ ਦੋ ਸਿੱਖ ਨੌਜਵਾਨ (18 ਸਾਲ ਤੋਂ ਵੱਧ ਤੇ 26 ਸਾਲ ਤੋਂ ਘੱਟ ਉਮਰ ਵਾਲੇ) ਮੁੰਢੇ-ਕੁੜੀਆਂ ਨੂੰ 21 ਦਿਨ ਦੇ “ਲੀਡਰਸ਼ਿਪ ਡਵੈਲਪਮੈਂਟ” ਦੇ $3500 ਵਾਲੇ ਕੋਰਸ ਤੇ ਫਰੀ ਭੇਜਿਆ ਕਰੇਗੀ।

ਇਸ ਤੋਂ ਇਲਾਵਾ ਸਿੱਖ ਕਾਊਂਸਲ ਆਫ ਨਿਊਜ਼ੀਲੈਂਡ ਖਾਲਸਾ ਸਕੂਲ ਸ਼ੁਰੂ ਕਰਣ ਤੋਂ ਕੇਵਲ ਕੁੱਝ ਕੁ ਮਹੀਨੇ ਹੀ ਦੂਰ ਹੈ ਤੇ ਹੋਰ ਕਈ ਪ੍ਰਾਜੈਕਟ ਕੌਮ ਦੀ ਤਰੱਕੀ ਲਈ ਊਲੀਕ ਰਹੀ ਹੈ।

ਹੁਣ ਸੰਗਤ ਆਪ ਫੈਸਲਾ ਕਰ ਲਵੇ ਕਿ ਇਸ ਤਿਕੜੀ ਨੂੰ ਕਿਹੜਾ ਡਰ ਖਾ ਰਿਹਾ ਹੈ ਕਿ ਇਹ ਪਹਿਲਾਂ ਤਾਂ ਸਿੱਖ ਕਾਊਂਸਲ ਆਫ ਨਿਊਜ਼ੀਲੈਂਡ ਨੂੰ ਗਾਲਾਂ ਕੱਢਦੇ ਸਨ (ਤੇ ਅਜੇ ਵੀ ਸਾਨੂੰ ਸੱਟ ਮਾਰਣ ਦਾ ਮੌਕਾ ਨਹੀਂ ਗਵਾਉਂਦੇ) ਤੇ ਹੁਣ ਏਕੇ ਦੀ ਗੱਲ (ਸਿਰਫ ਗੱਲ ਹੀ) ਕਰਦੇ ਹਨ। ਸਾਨੂੰ ਤਾਂ ਇਉਂ ਜਾਪਦਾ ਹੈ ਕਿ ਜਿਹੜੀਆਂ ਤਾਕਤਾਂ ਸਿੱਖ ਕੌਮ ਦੀ ਤਰੱਕੀ ਨੂੰ ਰੋਕਣ ਤੇ ਉਤਾਰੂ ਹਨ ਉਹੀ ਸਿੱਖ ਕਾਊਂਸਲ ਆਫ ਨਿਊਜ਼ੀਲੈਂਡ ਨੂੰ ਢਾਹ ਲਾਉਣ ਦਾ ਪੂਰਾ ਜਤਨ ਕਰ ਰਹੀਆਂ ਹਨ।

ਕੌਮ ਦੀ ਸਦਾ ਚੜ੍ਹਦੀ ਕਲਾ ਦੇ ਚਾਹਵਾਨ

ਸਿੱਖ ਕਾਊਂਸਲ ਆਫ ਨਿਊਜ਼ੀਲੈਂਡ ਦੇ ਸੇਵਾਦਾਰ ਸਿੰਘ ਤੇ ਸਿੰਘਣੀਆਂ